ಮೌಢ್ಯತೆ ಶುದ್ಧೀಕರಣದ ಸಾಧನ ಜ್ಯೋತಿಷ್ಯ ನಿಷೇಧ ಸರಿಯಲ್ಲ: ಬೇಲಿಮಠ ಸ್ವಾಮೀಜಿ

ಬೆಂಗಳೂರು: `ನಂಬಿಕೆ ಮತ್ತು ಮೂಢನಂಬಿಕೆ ಎರಡೂ ವಿಭಿನ್ನ. ಸರ್ವರಿಗೂ ಹಿತ ಬಯಸುವುದು ನಂಬಿಕೆಯಾದರೆ, ಸರ್ವರ ಹಿತವನ್ನು ಸ್ವಾರ್ಥಕ್ಕಾಗಿ ಬಲಿ ಕೊಡುವುದು ಮೂಢನಂಬಿಕೆ. ಜ್ಯೋತಿಷ್ಯ ಶಾಸ್ತ್ರ ಮೂಢನಂಬಿಕೆಯಾಗುವುದಿಲ್ಲ' ಎಂದು ಬೇಲಿಮಠದ ಮಹಾಸಂಸ್ಥಾನದ ಶ್ರೀ ಶಿವರುದ್ರ ಸ್ವಾಮೀಜಿ ಅಭಿಪ್ರಾಯಪಟ್ಟಿದ್ದಾರೆ.

ಬುಧವಾರ ನಡೆದ `6ನೇ ಅಂತಾರಾಷ್ಟ್ರೀಯ ಜ್ಯೋತಿಷ್ಯವೈದ್ಯ' ಸಮ್ಮೇಳನ ಉದ್ಘಾಟಿಸಿ ಮಾತನಾಡಿದ ಅವರು, ಜ್ಯೋತಿಷ್ಯ ಜ್ಯೋತಿರ್ವಿಜ್ಞಾನವಾಗಿದ್ದು, ದಾರ್ಶನಿಕರಿಂದ ಬೆಳೆದುಬಂದ ಶಾಸ್ತ್ರ. ಗಣಿತಶಾಸ್ತ್ರ ಅದರ ಮೂಲವಾಗಿದ್ದು, ಅತ್ಯಂತ ವಿಶಿಷ್ಟ ಹಾಗೂ ತರ್ಕಬದ್ಧ ಲೆಕ್ಕಚಾರ ಒಳಗೊಂಡಿದೆ ಎಂದು ಬೇಲಿಮಠದ ಮಹಾಸಂಸ್ಥಾನದ ಶಿವರುದ್ರ ಸ್ವಾಮೀಜಿ ಒತ್ತಾಯಿಸಿದರು. 

ಬೋಧನೆಗೆ ಅನುಮತಿ ನೀಡಿ: ಮೂಢನಂಬಿಕೆ ಹೆಸರಿನಲ್ಲಿ ಜ್ಯೋತಿಷ್ಯ-ಶಾಸ್ತ್ರವನ್ನು ಸರ್ಕಾರ ನಿಷೇಧಿಸುವುದು ಸರಿಯಲ್ಲ. ಅಸ್ತಿತ್ವ ಕಳೆದುಕೊಂಡಿದ್ದ ಆಯುರ್ವೇದ ಪದ್ಧತಿಯನ್ನು 20 ವರ್ಷಗಳ ಹಿಂದೆ ವೈಜ್ಞಾನಿಕ ನೆಲೆಯಲ್ಲಿ¸ ಸಂಶೋಧನೆಗೊಳಪಡಿಸಿ ಅಭಿವೃದ್ಧಿಪಡಿಸಿದ ಮಾದರಿಯಲ್ಲೇ ಜ್ಯೋತಿಷ್ಯ ಶಾಸ್ತ್ರವನ್ನೂ ಶುದ್ಧೀಕರಿಸಬೇಕು ಎಂದು ಸ್ವಾಮಿಜಿ ಹೇಳಿದರು. 

ಆನಂದ್ ಗುರೂಜಿ ಮಾತನಾಡಿ, ಜ್ಯೋತಿಷ್ಯಶಾಸ್ತ್ರ ನಿನ್ನೆ ಅಥವಾ ಮೊನ್ನೆ ಬಂದದ್ದು ಅಲ್ಲ. ಪುರಾತನವಾದ ಸನಾತನ ಧರ್ಮ ಹಾಗೂ ಹಿಂದೂ ಧರ್ಮದ ಭಾಗವಾಗಿದೆ. ಜ್ಯೋತಿಷ್ಯ ವನ್ನು ಮೂಢನಂಬಿಕೆಯಾಗಿ ಬಿಂಬಿಸಬಾರದು ಎಂದರು.