ಮಂಡ್ಯ: ಹದಿಮೂರು ವರ್ಷ ಹಿಂದೆ ನಡೆದಿದ್ದ ರೈತಸಂಘದ ಕಾರ್ಯಕರ್ತನ ಕೊಲೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಎಂಟು ಆರೋಪಿಗಳಿಗೆ ಇಲ್ಲಿನ ಐದನೇ ಹೆಚ್ಚುವರಿ ಜಿಲ್ಲಾ ಮತ್ತು
ಸೆಷನ್ಸ್ ನ್ಯಾಯಾಲಯ ಜೀವಾವಧಿ ಶಿಕ್ಷೆ ಮತ್ತು ತಲಾ ರು.20 ಸಾವಿರ ದಂಡ ವಿಧಿಸಿ ಗುರುವಾರ ತೀರ್ಪು ನೀಡಿದೆ.
ಮದ್ದೂರು ತಾಲೂಕು ಬಸವಲಿಂಗನದೊಡ್ಡಿ ನಿವಾಸಿಗಳಾದ ನಾಗರಾಜು ಅಲಿಯಾಸ್ ನಾಗ (42), ಮರಿದಿಮ್ಮ (58), ಬಸವರಾಜು (42), ರಾಜು (40), ಗಂಗ ಅಲಿಯಾಸ್ ಗಂಗರಾಜು (33), ಬಸವರಾಜು (48), ರಾಮಕೃಷ್ಣ (38) ಹಾಗೂ ಅಡಗನಹಳ್ಳಿ ಬಾಲಾಜಿ (38) ಶಿಕ್ಷೆಗೊಳಗಾದ ಆರೋಪಿಗಳು.
ಬಸವಲಿಂಗನದೊಡ್ಡಿಯಲ್ಲಿ ಬೀರೇದೇವರ ಹಬ್ಬದ ವೇಳೆ ರಾಜಕೀಯ ವೈಷಮ್ಯದ ಹಿನ್ನೆಲೆಯಲ್ಲಿ ಎರಡು ಗುಂಪುಗಳ ನಡುವೆ ಘರ್ಷಣೆ ನಡೆದಿತ್ತು. ಅದರ ಬೆನ್ನಲ್ಲೇ 2002ರ ಅಕ್ಟೋಬರ್ 31ರಂದು ಬಸವಲಿಂಗನದೊಡ್ಡಿಯ ಕೆಂಚೇಗೌಡರ ಜಮೀನಿನಲ್ಲಿದ್ದ ಅದೇ ಗ್ರಾಮದ ನಿವಾಸಿ, ರೈತಸಂಘದ ಕಾರ್ಯಕರ್ತ ರಮೇಶ್(28) ಮೇಲೆ ಆರೋಪಿಗಳು ಮಾರಕಾಸ್ತ್ರಗಳಿಂದ ಹಲ್ಲೆ ನಡೆಸಿ ಕೊಲೆ ಮಾಡಿದ್ದರು. ಈ ಆರೋಪಿಗಳು ಕಾಂಗ್ರೆಸ್ ಕಾರ್ಯಕರ್ತರಾಗಿದ್ದರು.
ಪ್ರಕರಣ ದಾಖಲಿಸಿಕೊಂಡ ಕೆಸ್ತೂರು ಪೊಲೀಸರು 8 ಆರೋಪಿಗಳನ್ನು ಬಂಧಿಸಿ, ನ್ಯಾಯಾಲಯಕ್ಕೆ ದೋಷಾರೋಪಣಾ ಪಟ್ಟಿ ಸಲ್ಲಿಸಿದ್ದರು. ಪ್ರಕರಣದ ವಿಚಾರಣೆ 13 ವರ್ಷಗಳ ಕಾಲ ಸುದೀರ್ಘವಾಗಿ ನಡೆದು ಗುರುವಾರ ತೀರ್ಪು ಹೊರಬಿತ್ತು. ನ್ಯಾಯಾಧೀಶ ಕೆ.ಬಿ.ಪಾಟೀಲ್ ಅವರು ತೀರ್ಪು ನೀಡಿದರು. ಪ್ರಕರಣದಲ್ಲಿ ಸರ್ಕಾರದ ಪರವಾಗಿ ವಿಶೇಷ ಸರ್ಕಾರಿ ಅಭಿಯೋಜಕ ಗೊರವಾಲೆ ಕೃಷ್ಣೇಗೌಡ ವಾದ ಮಂಡಿಸಿದ್ದರು.
