ರಜೌರಿ: ಭಾರತದ ಗಡಿ ನುಸುಳಲು ಯತ್ನಿಸುತ್ತಿದ್ದ ಪಾಕಿಸ್ತಾನ ಆಕ್ರಮಿತ ಕಾಶ್ಮೀರ ಮೂಲದ 12 ವರ್ಷದ ಬಾಲಕನೊಬ್ಬನನ್ನು ಭಾರತೀಯ ಸೇನೆ ವಶಕ್ಕೆ ಪಡೆದುಕೊಂಡಿದೆ ಎಂದು ಶುಕ್ರವಾರ ತಿಳಿದುಬಂದಿದೆ.
ಜಮ್ಮು ಮತ್ತು ಕಾಶ್ಮೀರದ ನೌಶೆರಾ ಸೆಕ್ಟರ್'ನ ರಜೌರಿ ಜಿಲ್ಲೆಯ ಗಡಿ ನಿಯಂತ್ರಣ ರೇಖೆ ಬಳಿ ನಿನ್ನೆ ಸಂಜೆ ಬಾಲಕ ಗಡಿ ನುಸುಳಲು ಯತ್ನಿಸುತ್ತಿದ್ದ. ಈ ವೇಳೆ ಭಾರತೀಯ ಸೇನೆ ವಶಕ್ಕೆ ಪಡೆದುಕೊಂಡಿದೆ ವರದಿಗಳು ತಿಳಿಸಿವೆ.
ಬಲೂಚಿಸ್ತಾನದ ಯೋಧ ಹುಸೇನ್ ಮಿಲ್ ಅವರ ಪುತ್ರ ಅಶ್ಫಕ್ ಅಲಿ ಚೌಹಾಣ್ ಬಂಧಿತ ಬಾಲಕನಾಗಿದ್ದಾನೆ. ಗಡಿ ನುಸುಳುತ್ತಿದ್ದ ವೇಳೆ ಸೇನಾ ಪಡೆ ಸೂಚನೆ ನೀಡಿದೆ. ನಂತರ ಬಾಲಕ ಸೇನಾಪಡೆಗೆ ಶರಣಾಗಿದ್ದಾನೆಂದು ತಿಳಿದುಬಂದಿದೆ.
ಬಾಲಕ ಗಡಿ ನುಸುಳುವಂತೆ ಉಗ್ರರು ಸೂಚನೆ ನೀಡಿದ್ದು, ಉಗ್ರರ ಸೂಚನೆಯಂತೆ ಬಾಲಕ ಗಡಿ ನುಸುಳಲು ಯತ್ನಿಸಿದ್ದಾನೆಂದು ಮೂಲಗಳು ತಿಳಿಸಿವೆ. ಪ್ರಸ್ತುತ ಬಾಲಕನನ್ನು ಜಮ್ಮು ಮತ್ತು ಕಾಶ್ಮೀರ ಪೊಲೀಸ ವಶಕ್ಕೆ ನೀಡಲಾಗಿದ್ದು, ವಿಚಾರಣೆ ನಡೆಸಲಾಗುತ್ತಿದೆ.