ಇಂದಿನ ಇಂಟರ್‌ನೆಟ್ ಯುಗದಲ್ಲಿ ಮಾಹಿತಿಗೆ ಯಾವ ಕೊರತೆಯೂ ಇಲ್ಲ. ಯಾರು ಬೇಕಾದರೂ ಅಂತರ್ಜಾಲ ಸಂಪರ್ಕವಿದ್ದರೆ ತಾವು ಸರ್ವಜ್ಞರೆಂದು ತೋರಿಸಿಕೊಳ್ಳಬಹುದು. ಆದರೆ ಹೀಗೆ ತೋರಿಸಿಕೊಳ್ಳುವುದಕ್ಕೂ ತುಸು ಅರಿವು ಬೇಕಾಗುತ್ತದೆ. ಮಾಹಿತಿಯೆಲ್ಲವೂ ಜ್ಞಾನವಲ್ಲ. ನಮ್ಮೆದುರು ಸಾವಿರಗಟ್ಟಲೆ ಪುಟಗಳಷ್ಟು ಮಾಹಿತಿಯ ಭಂಡಾರವೇ ಇರಬಹುದು. ಆದರೆ ಅದನ್ನು ಸರಿಯಾದ ಉಪಯೋಗಿಸಿಕೊಳ್ಳುವ ವಿವೇಕ ಇಲ್ಲದಿದ್ದರೆ ಆ ಮಾಹಿತಿಯ ಸಾಗರದಿಂದ ಏನು ಪ್ರಯೋಜನ? ಮಾಹಿತಿ ಭಂಡಾರದಿಂದ ಯಾವುದನ್ನು, ಎಲ್ಲಿಂದ, ಎಷ್ಟು ಪ್ರಮಾಣದಲ್ಲಿ ಹೆಕ್ಕಿಕೊಳ್ಳಬೇಕು ಎಂಬ ತಿಳಿವು ನಾವು ಗ್ರಂಥಗಳನ್ನು ಓದಿ ಪಕ್ವಗೊಳಿಸಿಕೊಂಡ ಬುದ್ಧಿಯಿಂದ ಬರುವಂಥದು. ಓದಿನ ಖುಷಿಯು, ಮನುಷ್ಯ ಕಂಡುಕೊಂಡ ಅತ್ಯಪೂರ್ವವಾದೊಂದು ಸುಖ. ಬ್ರಹ್ಮಾನಂದವನ್ನು ನಾನು ಕಂಡರಿಯೆವು, ಸಂಗೀತದಿಂದ ದೊರೆಯುವ ಆನಂದವನ್ನು ಅನುಭವಿಸಬಲ್ಲೆವು. ಓದಿನ ಸುಖವೂ ಅಂಥ ಒಂದು ರಸಾನುಭವ. ಅದು ಮಾತಿಗೆ ಮಿಗಿಲಾದದ್ದು.
