ಪಾಕ್'ನಲ್ಲಿ 2ನೇ ಸುತ್ತಿನ ಸಂಧಾನ ಸಭೆ: ನೇರ ಮಾತುಕತೆಗೆ ಅಮೆರಿಕಾ ಒತ್ತಾಯ, ಇರಾನ್ ನಕಾರ

ಮಧ್ಯಪ್ರಾಚ್ಯದಲ್ಲಿ ಉಲ್ಬಣಗೊಂಡಿರುವ ಉದ್ವಿಗ್ನತೆ ಮತ್ತು ಹಾರ್ಮುಜ್ ಸಂಕಷ್ಟದ ನಡುವೆ ಪಾಕಿಸ್ತಾನದಲ್ಲಿ ಅಮೆರಿಕಾ–ಇರಾನ್ ನಡುವಿನ ಎರಡನೇ ಸುತ್ತಿನ ಸಂಧಾನ ಸಭೆ ನಡೆಯುತ್ತಿದ್ದು, ಈ ಮಾತುಕತೆ ಮಹತ್ವ ಪಡೆದುಕೊಂಡಿದೆ. ಆದರೆ, ನೇರ ಮಾತುಕತೆ ಕುರಿತಾಗಿ ಎರಡೂ ದೇಶಗಳ ನಡುವೆ ಭಿನ್ನಾಭಿಪ್ರಾಯಗಳು ಮುಂದುವರಿದಿರುವುದು ಸಂಧಾನ ಪ್ರಕ್ರಿಯೆಗೆ ಸವಾಲಾಗಿ ಪರಿಣಮಿಸಿದೆ.

ಅಮೆರಿಕ ಅಧ್ಯಕ್ಷ ಡೊನಾಲ್ಟ್ ಟ್ರಂಪ್ ಆಡಳಿತವು ಈ ಬಾರಿ ನೇರ (direct) ಮಾತುಕತೆಗಳಿಗೆ ಒತ್ತಾಯಿಸುತ್ತಿದೆ. ತಮ್ಮ ವಿಶೇಷ ಪ್ರತಿನಿಧಿಗಳಾದ ಸ್ಟೀವ್ ವಿಟ್ಕಾಫ್ ಮತ್ತು ಜೇರೆಡ್ ಕುಶ್ನರ್ ಅವರನ್ನು ಇಸ್ಲಾಮಾಬಾದ್‌ಗೆ ಕಳುಹಿಸಿರುವ ಅಮೆರಿಕಾ, ಮುಖಾಮುಖಿ ಚರ್ಚೆಗಳ ಮೂಲಕ ತ್ವರಿತವಾಗಿ ಒಪ್ಪಂದಕ್ಕೆ ಬರಲು ಯತ್ನಿಸುತ್ತಿದೆ.

ವೈಟ್‌ಹೌಸ್ ಪ್ರಕಾರ, ನೇರ ಸಂವಾದವೇ ನಂಬಿಕೆ ನಿರ್ಮಾಣಕ್ಕೆ ಮತ್ತು ಯುದ್ಧ ವಿರಾಮದ ದಿಕ್ಕಿನಲ್ಲಿ ಸ್ಪಷ್ಟ ಪ್ರಗತಿಗೆ ಸಹಕಾರಿ ಎಂದು ಹೇಳಿದೆ.

ಆದರೆ, ಇರಾನ್ ತನ್ನ ನಿಲುವಿನಲ್ಲಿ ಯಾವುದೇ ಬದಲಾವಣೆ ತೋರಿಸುತ್ತಿಲ್ಲ. ಇರಾನ್ ವಿದೇಶಾಂಗ ಸಚಿವ ಅಬ್ಬಾಸ್ ಅರಘ್ಚಿ ಅವರು ನೇರ ಮಾತುಕತೆಗಳಿಗೆ ಸಮ್ಮತಿಸದೆ, ಪಾಕಿಸ್ತಾನವನ್ನು ಮಧ್ಯವರ್ತಿಯಾಗಿ ಬಳಸಿಕೊಂಡು ಪರೋಕ್ಷ (indirect) ಸಂಧಾನವನ್ನೇ ಮುಂದುವರಿಸಲು ತೀರ್ಮಾನಿಸಿದ್ದಾರೆ.

ಅಮೆರಿಕಾದ ನೌಕಾ ದಿಗ್ಬಂಧನ (naval blockade) ಮುಂದುವರಿದಿರುವವರೆಗೆ ನೇರ ಸಂಧಾನ ಸಾಧ್ಯವಿಲ್ಲ ಎಂಬುದು ಇರಾನ್ ಕಠಿಣ ನಿಲುವಾಗಿದೆ.

ಈ ನಡುವೆ ಹಾರ್ಮುಜ್ ಜಲಸಂಧಿಯಲ್ಲಿ ಉಂಟಾಗಿರುವ ಉದ್ವಿಗ್ನತೆ ಜಾಗತಿಕ ಇಂಧನ ಸರಬರಾಜಿನ ಮೇಲೆ ಗಂಭೀರ ಪರಿಣಾಮ ಬೀರಿದೆ. ತೈಲ ಮತ್ತು ನೈಸರ್ಗಿಕ ಅನಿಲ ಸಾಗಣೆ ಕುಂಠಿತವಾಗಿದ್ದು, ಜಾಗತಿಕ ಮಾರುಕಟ್ಟೆಯಲ್ಲಿ ಬೆಲೆ ಏರಿಳಿತ ಕಂಡುಬರುತ್ತಿದೆ. ಹಾರ್ಮುಜ್ ಮಾರ್ಗವು ವಿಶ್ವದ ಇಂಧನ ಸಾಗಣೆಯ ಪ್ರಮುಖ ದಾರಿಯಾಗಿರುವುದರಿಂದ, ಇದರ ಅಡಚಣೆಗಳು ಹಲವು ದೇಶಗಳ ಆರ್ಥಿಕ ಸ್ಥಿತಿಗತಿ ಮೇಲೆ ನೇರ ಪರಿಣಾಮ ಬೀರಿವೆ.

ಮೊದಲ ಸುತ್ತಿನ ಮಾತುಕತೆಗಳು ಉಪಾಧ್ಯಕ್ಷ ಜೆಡಿ.ವ್ಯಾನ್ಸ್ ನೇತೃತ್ವದಲ್ಲಿ ನಡೆದರೂ ಯಾವುದೇ ಸ್ಪಷ್ಟ ಫಲಿತಾಂಶ ನೀಡಲಿಲ್ಲ. ಹೀಗಾಗಿ, ಸ್ಟೀವ್ ವಿಟ್ಕಾಫ್ ಮತ್ತು ಜೇರೆಡ್ ಕುಶ್ನರ್ ಅವರನ್ನು ಇಸ್ಲಾಮಾಬಾದ್‌ಗೆ ಕಳುಹಿಸುತ್ತಿದ್ದು, ಮಾತುಕತೆಗಳು ಯಶಸ್ನಿಯಾದರೆ ಮಾತ್ರ ಜೆಡಿ.ವ್ಯಾನ್ಸ್ ಪಾಕಿಸ್ತಾನಕ್ಕೆ ಭೇಟಿ ನೀಡಲಿದ್ದಾರೆಂದು ಹೇಳಲಾಗುತ್ತಿದೆ.

ವಿದೇಶಾಂಗ ಕಾರ್ಯದರ್ಶಿ ಮಾರ್ಕೊ ರುಬಿಯೋ ಸೇರಿದಂತೆ ಅಮೆರಿಕದ ರಾಷ್ಟ್ರೀಯ ಭದ್ರತಾ ತಂಡ ಪರಿಸ್ಥಿತಿಯನ್ನು ನಿಕಟವಾಗಿ ಗಮನಿಸುತ್ತಿದೆ.

ಈ ನಡುವೆ ಯುರೋಪಿಯನ್ ಕೌನ್ಸಿಲ್‌ನ ಅಧ್ಯಕ್ಷ ಆಂಟೋನಿಯೊ ಕೋಸ್ಟಾ ಅವರು ಹಾರ್ಮುಜ್ ಮಾರ್ಗವನ್ನು ತಕ್ಷಣವೇ ಯಾವುದೇ ನಿರ್ಬಂಧವಿಲ್ಲದೆ ತೆರೆಯಬೇಕು ಎಂದು ಒತ್ತಾಯಿಸಿದ್ದು, “ಇದು ಜಾಗತಿಕ ಆರ್ಥಿಕತೆಗೆ ಅತ್ಯಗತ್ಯ” ಎಂದು ಹೇಳಿದ್ದಾರೆ.