'ಪ್ರಧಾನಿ ಮೋದಿ ಇಸ್ರೇಲ್ ಮತ್ತು ಇರಾನ್‌ಗೆ ಒಂದು ಫೋನ್ ಕರೆ ಮಾಡಿದ್ರೆ ಯುದ್ಧ ನಿಲ್ಲುತ್ತದೆ': UAE ರಾಯಭಾರಿ ಹುಸೇನ್ ಹಸನ್ ಮಿರ್ಜಾ

ನವದೆಹಲಿ: ಇರಾನ್-ಇಸ್ರೇಲ್ ಸಂಘರ್ಷ ದೊಡ್ಡ ಸಮಸ್ಯೆಯಾಗಿ ಉಲ್ಬಣಿಸಿದ್ದು, ಭಾರತದ ಪ್ರಧಾನಿ ನರೇಂದ್ರ ಮೋದಿ ಅವರು ಇಸ್ರೇಲ್ ಮತ್ತು ಇರಾನ್‌ಗೆ ಒಂದೇ ಒಂದು ಫೋನ್ ಕರೆ ಮಾಡಿ ಸಂಘರ್ಷ ನಿಲ್ಲಿಸುವಂತೆ ಹೇಳಿದರೆ ಎಲ್ಲ ಸಮಸ್ಯೆಗಳು ಬಗೆಹರಿಯುತ್ತದೆ ಎಂದು UAE ರಾಯಭಾರಿ ಹುಸೇನ್ ಹಸನ್ ಮಿರ್ಜಾ ಹೇಳಿದ್ದಾರೆ.

ಹಾಲಿ ನಡೆಯುತ್ತಿರುವ ಇರಾನ್-ಇಸ್ರೇಲ್ ಮತ್ತು ಅಮೆರಿಕ ಯುದ್ಧ ಮತ್ತು ಇಂಧನ ಪರಿಸ್ಥಿತಿ ಕುರಿತು ಖಾಸಗಿ ಸುದ್ದಿವಾಹಿನಿಯೊಂದಿಗೆ ಮಾತನಾಡಿದ ಭಾರತದ ಮೊದಲ UAE ರಾಯಭಾರಿ ಹುಸೇನ್ ಹಸನ್ ಮಿರ್ಜಾ ಅವರು, 'ಇರಾನ್-ಇಸ್ರೇಲ್ ಸಂಘರ್ಷದಲ್ಲಿ ಭಾಗಿಯಾಗಲು ಯುಎಇ ಯಾವುದೇ ಇಚ್ಛೆಯನ್ನು ಹೊಂದಿಲ್ಲ. ಅಂತೆಯೇ ತನ್ನ ಭೂ ಪ್ರದೇಶವನ್ನು ಎರಡೂ ಕಡೆಯಿಂದ ಲಾಂಚ್ ಪ್ಯಾಡ್ ಆಗಿ ಬಳಸಲು ಬಿಡುವುದಿಲ್ಲ ಎಂದು ಹೇಳಿದ್ದಾರೆ.

"ಪ್ರಾಮಾಣಿಕವಾಗಿ ಹೇಳಬೇಕೆಂದರೆ, ನಾವು ಏಕೆ ಭಾಗಿಯಾಗಿದ್ದೇವೆ ಎಂದು ನನಗೆ ಖಚಿತವಿಲ್ಲ. ಇದರಲ್ಲಿ ಯುಎಇ ಭಾಗಿಯಾಗಲು ಯಾವುದೇ ಕಾರಣವಿಲ್ಲ. ಅಬುಧಾಬಿ ಸೂಕ್ಷ್ಮ ಭೌಗೋಳಿಕ ರಾಜಕೀಯ ಸ್ಥಾನದಲ್ಲಿದೆ. ಇದು ಇರಾನ್‌ಗೆ ನೆರೆಯ ರಾಷ್ಟ್ರ ಮತ್ತು ಅಬ್ರಹಾಂ ಒಪ್ಪಂದಗಳ ಅಡಿಯಲ್ಲಿ ಇಸ್ರೇಲ್‌ಗೆ ಪಾಲುದಾರ. ಆ ನಿಲುವು ನಿಖರವಾಗಿ ಯುಎಇಯನ್ನು ಉಪಯುಕ್ತವಾಗಿಸುತ್ತದೆ ಎಂದು ಮಿರ್ಜಾ ಹೇಳಿದರು.

ಮೋದಿ ಒಂದು ಫೋನ್ ಕರೆ ಮಾಡಿದ್ರೆ ಸಾಕು..

ಇದೇ ವೇಳೆ "ನಾವು ಇಬ್ಬರ ನಡುವೆ ಮಾತುಕತೆ ನಡೆಸಬಹುದು" ಎಂದು ಹೇಳಿದ ಹುಸೇನ್ ಹಸನ್ ಮಿರ್ಜಾ, 'ಅವರು ನಮ್ಮ ನೆಲದಲ್ಲಿ ಪರಸ್ಪರ ಹೋರಾಡುತ್ತಿದ್ದಾರೆ. ಅದು ಸ್ವೀಕಾರಾರ್ಹವಲ್ಲ ಎಂದು ಹೇಳಿದ್ದಾರೆ.

ಯುಎಇ ನಾಯಕತ್ವಕ್ಕೆ ಪ್ರಧಾನಿ ನರೇಂದ್ರ ಮೋದಿ ಅವರ ಸಂಪರ್ಕದ ಕುರಿತು ಮಾತನಾಡಿದ ಅವರು, 'ಪ್ರಧಾನಿ ಮೋದಿ ಗಲ್ಫ್ ನಾಯಕರಲ್ಲಿ ಮಾತ್ರವಲ್ಲದೆ ಪ್ರದೇಶದ ಸಾರ್ವಜನಿಕ ಮತ್ತು ವ್ಯಾಪಾರ ಸಮುದಾಯಗಳಲ್ಲಿ ಗೌರವವನ್ನು ಹೊಂದಿದ್ದಾರೆ ಮತ್ತು ಪ್ರಸ್ತುತ ಸಂಘರ್ಷದಲ್ಲಿ ಎರಡೂ ಪಕ್ಷಗಳಿಗೂ ವಿಶ್ವಾಸಾರ್ಹತೆ ವಿಸ್ತರಿಸುತ್ತದೆ ಎಂದು ಮಿರ್ಜಾ ಹೇಳಿದರು.

"ನರೇಂದ್ರ ಮೋದಿ ಅವರು ಇರಾನ್ ಮತ್ತು ಇಸ್ರೇಲ್‌ನಲ್ಲಿರುವ ತಮ್ಮ ಸಹವರ್ತಿಗಳಿಗೆ ಒಂದು ಫೋನ್ ಕರೆ ಮಾಡಿ ಚರ್ಚಿಸಿದರೆ ಈ ಸಮಸ್ಯೆಯನ್ನು ಪರಿಹರಿಸಬಹುದು, ಈ ಸಮಸ್ಯೆಯನ್ನು ಕೊನೆಗೊಳಿಸಬಹುದು. ನಮ್ಮ ನೆಲದಲ್ಲಿ ಹೇರಲ್ಪಟ್ಟಿರುವ ಯುದ್ಧದಲ್ಲಿ ಹೋರಾಟ ನಡೆಸುತ್ತಿರುವ ಎರಡೂ ಯೋಧರು (ಇಸ್ರೇಲ್-ಇರಾನ್)ಅವರ ಮಾತಿನೊಂದಿಗೆ ನಿಲ್ಲುತ್ತಾರೆ ಎಂಬ ವಿಶ್ವಾಸವಿದೆ. ಅವರು ನಮ್ಮ ನೆಲದಲ್ಲಿ ಪರಸ್ಪರ ಹೋರಾಡುತ್ತಿದ್ದಾರೆ. ಇದು ಸ್ವೀಕಾರಾರ್ಹವಲ್ಲ ಎಂದು ಮಿರ್ಜಾ ಹೇಳಿದರು.

ನಾನು ಮಿಲಿಟರಿ ವ್ಯಕ್ತಿ ಅಲ್ಲ

ಇದೇ ವೇಳೆ ನಾನು ಮಿಲಿಟರಿ ವ್ಯಕ್ತಿ ಅಲ್ಲ ಎಂದು ಹೇಳಿದ ಮಿರ್ಜಾ, ಇಲ್ಲಿಯವರೆಗೆ ಕನಿಷ್ಠ ಹಾನಿಯ ವರದಿಗಳು ಅವರ ಅಂದಾಜಿನ ಪ್ರಕಾರ ನಿಖರವಾಗಿವೆ ಎಂದು ಸ್ಪಷ್ಟಪಡಿಸಿದರು.

ಸಾವಿರಕ್ಕೂ ಹೆಚ್ಚು ಸಾವು

ಇನ್ನು ಇಸ್ರೇಲ್-ಅಮೆರಿಕ ಮತ್ತು ಇರಾನ್ ಯುದ್ಧದಲ್ಲಿ ಈವರೆಗೂ ಇರಾನ್ ನಲ್ಲಿ 1,332 ಮಂದಿ ಸಾವಿಗೀಡಾಗಿದ್ದಾರೆ ಎಂದು ಇರಾನ್‌ನ ವಿಶ್ವಸಂಸ್ಥೆಯ ರಾಯಭಾರಿ ಮಾಹಿತಿ ನೀಡಿದ್ದಾರೆ.

ಸಾವಿರಾರು ಜನರು ಗಾಯಗೊಂಡಿದ್ದು, ಚಿಕಿತ್ಸೆಯ ಸಮಯದಲ್ಲಿ ಏಳನೇ ಅಮೆರಿಕನ್ ಸೈನಿಕ ಕೂಡ ಸಾವನ್ನಪ್ಪಿದ್ದಾರೆ ಎಂದು ಅಮೆರಿಕ ದೃಢಪಡಿಸಿದೆ.

ಈ ನಡುವೆ ಇಸ್ರೇಲ್ ಸೇನೆಯು ಸೋಮವಾರ ಮಧ್ಯ ಇರಾನ್ ಮೇಲೆ ಹೊಸ ದಾಳಿಗಳನ್ನು ಪ್ರಾರಂಭಿಸಿದ್ದು, ಬೈರುತ್‌ನಲ್ಲಿ ಹೆಜ್ಬೊಲ್ಲಾ ಮೂಲಸೌಕರ್ಯವನ್ನು ಹೊಡೆದುರುಳಿಸಿದೆ.