'ಭಾರತದ ಸದ್ಯದ ದುಸ್ಥಿತಿಗೆ ಬಹುಮಟ್ಟಿಗೆ ಕಾರಣವಾದುದು ಭಾರತೀಯರ ಆಲಸ್ಯ ಮತ್ತು ಕೂಪಮಂಡೂಕ ಬುದ್ಧಿ.'
ನಮ್ಮ ದೇಶದ ಯುವಕರು ಹೆಚ್ಚಿನ ಸಂಖ್ಯೆಯಲ್ಲಿ ಚೀನಾ ಹಾಗೂ ಜಪಾನುಗಳಿಗೆ ಭೇಟಿ ನೀಡುವಂತಾಗಬೇಕು. ಜಪಾನಿಯರ ಪಾಲಿಗಂತೂ ಭಾರತವೆಂದರೆ ಶ್ರೇಷ್ಠ-ಉನ್ನತ ವಿಚಾರಗಳ ಸ್ವಪ್ನಲೋಕವೇ ಆಗಿದೆ. ಆದರೆ ಭಾರತೀಯರು ಜೀವನವಿಡೀ ಕಾಡು ಹರಟೆಯಲ್ಲೇ ಮುಳುಗಿರುವವರು, ಹರಟೆಮಲ್ಲರು. ಶತಶತಮಾನಗಳಿಂದಲೂ ಮೂಢನಂಬಿಕೆ-ಕಂದಾಚಾರಗಳ ಕಂತೆಗಳನ್ನೇ ತಲೆಯ ಮೇಲೆ ಹೊತ್ತು ಕುಳಿತಿರುವವರು!
ಈಗ ನೀವು ಮಾಡುತ್ತಿರುವುದಾದರೂ ಏನು? ನಿಮ್ಮ ತಲೆಯಲ್ಲಿರುವ ಅತ್ಯುನ್ನತ ಧ್ಯೇಯವೆಂದರೆ ತಿಂಗಳಿಗೆ ಸಂಬಳ ಎಣಿಸಿಕೊಳ್ಳುವುದು! ಇನ್ನೂ ಹೆಚ್ಚೆಂದರೆ ನೌಕರಿ ಹೊಂದುವುದು. ಇದೇ ಭಾರತೀಯ ಯುವಕರ ಪರಮಾದರ್ಶ. ಇಷ್ಟೇ ನಿಮ್ಮ ಬದುಕು!
ಲೌಕಿಕ ಜೀವನದ ಸಮೃದ್ಧಿ, ಸುವ್ಯವಸ್ಥೆಗಳಿಗಾಗಿ ತಮ್ಮ ರಾಷ್ಟ್ರಕ್ಕೆ ಬೇಕಾದುದೆಲ್ಲವನ್ನೂ ತಾವೇ ಉತ್ಪಾದಿಸುವ ಪಣ ತೊಟ್ಟು ಕಾರ್ಯಶೀಲರಾಗಿ. ಜೀವನದ ಪ್ರತಿಯೊಂದು ರಂಗದಲ್ಲೂ ಪ್ರಗತಿಯ ಹಂಬಲ ಎದ್ದು ಕಾಣಲಿ. ಅಭಿವೃದ್ಧಿಯ ಕುರಿತಾದ ತೀವ್ರ ಉತ್ಸಾಹ, ಕೈಗಾರಿಕೆ, ವಿದ್ಯಾಭ್ಯಾಸ, ವ್ಯವಸಾಯ ಮೊದಲಾದ ಪ್ರತಿಯೊಂದು ಕ್ಷೇತ್ರದಲ್ಲೂ ಮುನ್ನಡೆ ಸಾಧಿಸಿ ಸ್ವಾವಲಂಬಿಗಳಾಗಬೇಕೆಂಬ ಛಲವಿರಲಿ. ಸದ್ವಿಚಾರಗಳನ್ನು, ಸತ್ಕಾರ್ಯಗಳನ್ನು ಮುಕ್ತ ಮನಸ್ಸಿನಿಂದ, ತೆರೆದ ಹೃದಯದಿಂದ ಸ್ವೀಕರಿಸಿ, ಅನುಷ್ಠಾನಗೊಳಿಸಿ...
= ಆನಂದ ಎಸ್.ಎನ್.