ಆತನೊಬ್ಬ ಬ್ರಾಹ್ಮಣ ವಟು, ಪುರೋಹಿತ ಪುತ್ರ. ಅಪ್ಪ ಚಿಕ್ಕಪ್ಪಂದಿರೊಡನೆ ಯಜ್ಞಗಳಿಗೆ ಹೋಗಿ, ಯಜ್ಞದಲ್ಲಿ ಪಾಲ್ಗೊಂಡು ನೋಡಿದ್ದೆಲ್ಲವೂ ಯಜ್ಞಮಯವಾಗಿಯೇ ಕಾಣಿಸುವ ಕಾಲ. ಇಂಥವನಿಗೂ ಮದುವೆಯಾಯಿತು. ಪ್ರಸ್ತವೂ ಆಯ್ತೆಂದು ಬೇರೆ ಹೇಳಬೇಕೆ? ಪ್ರಸ್ತದ ಮರುದಿನ, ಪ್ರಥಮ ರಾತ್ರಿ ಹೇಗಿತ್ತೆಂದು ಹೇಳುವಂತೆ ಆತನ ಗೆಳೆಯರು ಆತನನ್ನು ಒತ್ತಾಯಿಸಿದರು. ಆತ ಬಾಯಿಬಿಟ್ಟ:
ಅದ್ಯಾಪಿ ತಾಂ ನಿಜವಪುಃ ಕೃಶವೇದಿಮಧ್ಯಾಂ
ಉತ್ತುಂಗಸಂಭೃತಸುಧಾಸ್ತನಕುಂಭಯುಗ್ಮಾಮ್
ನಾನಾವಿಚಿತ್ರಕೃತಮಂಡನಮಂಡಿತಾಂಗೀಂ
ಸುಪ್ತೋತ್ಥಿತಾಂ ನಿಶಿ ದಿವಾ ನ ಹಿ ವಿಸ್ಮರಾಮಿ
ಮಧ್ಯರಾತ್ರಿಯಲ್ಲಿ ನಿದ್ರೆ ತಿಳಿದೆದ್ದು ನೋಡಿದೆ: ಆಕೆಯ ಶರೀರ ಜನಿವಾರದಂತೆ ತೆಳ್ಳಗಾಗಿ ಮಿರುಗುತ್ತಿತ್ತು. ಅವಳ ಸೊಂಟವು, ಯಜ್ಞಕುಂಡವನ್ನು ಗರ್ಭದಲ್ಲಿಟ್ಟುಕೊಂಡ ಯಜ್ಞವೇದಿಕೆಯಂತೆ ತೆಳ್ಳಗೆ ಬೆಳ್ಳಗೆ ಸುಂದರವಾಗಿ ಆಹ್ವಾನಿಸುತ್ತಿತ್ತು. ಇನ್ನು ಎದೆಯ ಮೇಲಿದ್ದ ಆ ಜೋಡಿ! ಅವು ಯಜ್ಞವೇದಿಕೆಯ ಮೇಲೆ ಸನ್ನದ್ಧಪಡಿಸಿದ್ದ ತುಂಬಿದ ಕಲಶಗಳೇ ಸೈ! ಆಕೆ ಧರಿಸಿದ ಚಿತ್ರವಿಚಿತ್ರವಾದ ಆಭರಣಗಳು ವೇದಿಕೆಯ ಮಾವಿನ ತಳಿರು ತೋರಣಗಳಂತೆ, ಪ್ರಸಾಧನ ಲೇಪನಗಳು ಗಂಧಚಂದನಾದಿಗಳಂತೆ ಕಂಗೊಳಿಸಿದವು.
ಗೆಳೆಯರಿಗೆ ಸುಸ್ತು. ಯಾಜ್ಞಿಕರ ಮಗನಿಗೆ ಅಲ್ಲೂ ಯಜ್ಞವೇ ಕಾಣಿಸಬೇಕೆ? ಪುಣ್ಯಾತ್ಮನಿಗೆ ಅವಳು ಯಜ್ಞವೇದಿಕೆಯಂತೆ ಕಾಣಿಸಿದ್ದೇನೋ ಸಮ, ಈತ ಹೋಮ ನೆರವೇರಿಸಿ ಪೂರ್ಣಾಹುತಿ ಕೊಟ್ಟನೋ ಇಲ್ಲವೋ ಆತ ಹೇಳಲಿಲ್ಲ.ಟಿ
- ಹರಿಹರ