ರಾಂಚಿ ಟೆಸ್ಟ್: ಫಾಲೋ ಆನ್‌ಗೆ ಸಿಲುಕಿ ತಿಣುಕಾಡಿದ ಆಫ್ರಿಕಾ, ಟೀಂ ಇಂಡಿಯಾ ಗೆಲುವಿಗೆ 2 ವಿಕೆಟ್ ಬಾಕಿ!

ರಾಂಚಿ: ಪ್ರವಾಸಿ ದಕ್ಷಿಣ ಆಫ್ರಿಕಾ ವಿರುದ್ಧದ ಮೂರನೇ ಹಾಗೂ ಅಂತಿಮ ಟೆಸ್ಟ್ ಪಂದ್ಯದಲ್ಲಿ ಟೀಂ ಇಂಡಿಯಾ ಗೆಲುವಿಗೆ ಇನ್ನು ಎರಡು ವಿಕೆಟ್ ಅಷ್ಟೇ ಉರುಳಿಸಬೇಕಿದೆ. 

ರಾಂಚಿಯಲ್ಲಿ ನಡೆಯುತ್ತಿರುವ ಮೂರನೇ ಟೆಸ್ಟ್ ಪಂದ್ಯದ ಮೂರನೇ ದಿನ ಮುಕ್ತಾಯಕ್ಕೆ ಆಫ್ರಿಕಾ ತಂಡ 132 ರನ್ ಗಳಿಗೆ 8 ವಿಕೆಟ್ ಕಳೆದುಕೊಂಡು ಸೋಲಿನ ಸುಳಿಗೆ ಸಿಲುಕಿದೆ. 

ಮೊದಲು ಬ್ಯಾಟಿಂಗ್ ಮಾಡಿದ್ದ ಟೀಂ ಇಂಡಿಯಾ 497 ರನ್ ಗಳಿಗೆ ಡಿಕ್ಲೇರ್ ಮಾಡಿಕೊಂಡಿತ್ತು. ನಂತರ ಇನ್ನಿಂಗ್ಸ್ ಆರಂಭಿಸಿದ್ದ ಆಫ್ರಿಕಾ ತಂಡ 162 ರನ್ ಗಳಿಗೆ ಆಲೌಟ್ ಆಗಿ ಫಾಲೋ ಆನ್ ಗೆ ಸಿಲುಕಿತ್ತು. ಫಾಲೋ ಆನ್ ನಿಂದ ತಪ್ಪಿಸಿಕೊಂಡು ಮುನ್ನಡೆ ಸಾಧಿಸಬೇಕಿದ್ದರೆ ಆಫ್ರಿಕಾ ತಂಡ 335 ರನ್ ಪೇರಿಸಬೇಕಿತ್ತು. ಆದರೆ ದ್ವಿತೀಯ ಇನ್ನಿಂಗ್ಸ್ ನಲ್ಲಿ ಆಫ್ರಿಕಾ 132 ರನ್ ಗಳಿಗೆ 8 ವಿಕೆಟ್ ಕಳೆದುಕೊಂಡಿದೆ. 

ಆಫ್ರಿಕಾ ತಂಡದ ಥ್ಯೂನಿಸ್ ಡಿ ಬ್ರೂಯಿನ್ ಅಜೇಯ 30 ಹಾಗೂ ಅನ್ರಿಚ್ ನಾರ್ಟ್ಜೆ ಅಜೇಯ 5 ರನ್ ಗಳಿಸಿದ್ದು ನಾಳೆ ನಾಲ್ಕನೇ ದಿನದಾಟ ಆರಂಭಿಸಲಿದ್ದಾರೆ. ದಕ್ಷಿಣ ಆಫ್ರಿಕಾ ಮುನ್ನಡೆ ಸಾಧಿಸಬೇಕಾದರೆ ಇನ್ನು 203 ರನ್ ಗಳ ಅವಶ್ಯಕತೆ ಇದೆ.