ಚಿಕ್ಕಮಗಳೂರು: ನಗರದ ಹೃದಯ ಭಾಗದಲ್ಲಿರುವ ಟೌನ್ ಮಹಿಳಾ ಸಮಾಜದ ಶಾಲೆಗೆ ಗುರುವಾರ ಮಟಮಟ ಮಧ್ಯಾಹ್ನ ನುಗ್ಗಿದ ಚಿರತೆಯನ್ನು ಅರಣ್ಯ ಇಲಾಖೆ ಸಿಬ್ಬಂದಿ ಸತತ ಆರು ಗಂಟೆ ಕಾರ್ಯಾಚರಣೆ ಬಳಿಕ ಸೆರೆ ಹಿಡಿದಿದ್ದಾರೆ.
ಚಿರತೆ ಇಬ್ಬರನ್ನು ಗಾಯಗೊಳಿಸಿದೆ. ಜೆರಾಕ್ಸ್ ಅಂಗಡಿಯಲ್ಲಿ ಅವಿತಿದ್ದ ಚಿರತೆ ಹಿಡಿಯಲು ಬೋನ್ ತಂದಿಟ್ಟು, ಅದು, ಬೋನಿನೊಳಗೆ ಬರುವಂತೆ ವ್ಯವಸ್ಥೆ ಮಾಡಲಾಗಿತ್ತು. ಮಧ್ಯಾಹ್ನ 12ಕ್ಕೆ ಕಟ್ಟಡದ ಒಳಹೊಕ್ಕ ಕಿಲಾಡಿ ಚಿರತೆ, ಸಂಜೆ 6ರವರೆಗೂ ಅತ್ತ ಸುಳಿಯಲೇ ಇಲ್ಲ. ಕೊನೆಗೆ ಅರವಲಿಕೆ ನೀಡಿ ಹಿಡಿಯಲಾಯಿತು.
ಶಾಲೆಯ ಚಿಕ್ಕದಾದ ಗೇಟ್ ಮೂಲಕವೇ ಆವರಣ ಪ್ರವೇಶಿಸಿ, ಜೆರಾಕ್ಸ್ ಅಂಗಡಿಯೊಳಗೆ ಹೋಗಿದೆ. ಈ ಅಂಗಡಿಯಲ್ಲಿದ್ದ ಮಹಿಳೆ ಸ್ವಲ್ಪ ಸಮಯದ ಮೊದಲು ಸಮೀಪದ ಹೋಟೆಲ್ ಗೆ ಕಾಫಿ ಕುಡಿಯಲು ಹೋಗಿದ್ದರು. ಚಿರತೆ ಅಂಗಡಿಯೊಳಗೆ ಹೋಗಿರುವುದನ್ನು ನೋಡಿದ ವ್ಯಕ್ತಿಯೋರ್ವ ತಕ್ಷಣವೇ ಬಾಗಿಲ ಚಿಲಕವನ್ನು ಹಾಕಿದ್ದಾನೆ.
