ನವದೆಹಲಿ: ಚೀನಾ ಅಕ್ರಮವಾಗಿ ಅಕ್ಸೈಯ್ ಚಿನ್ ಪ್ರದೇಶವನ್ನು ಅತಿಕ್ರಮಣ ಮಾಡಿದ್ದು, ಚೀನಾ ಪಡೆಗಳ ಗಡಿ ಅತಿಕ್ರಮಣದಿಂದ ಉಭಯ ದೇಶಗಳ ನಡುವಿನ ಬಾಂಧವ್ಯಕ್ಕೆ ಧಕ್ಕೆಯಾಗಿದೆ ಎಂದು ಕೇಂದ್ರ ಗೃಹ ಸಚಿವ ರಾಜನಾಥ್ ಸಿಂಗ್ ಹೇಳಿದ್ದಾರೆ.
ಚೀನಾದ ಅತಿಕ್ರಮಣದ ವಿರುದ್ಧ ಇಂದು ಹರಿಹಾಯ್ದ ರಾಜನಾಥ್ ಸಿಂಗ್, ಭಾರತದ ಗಡಿಯನ್ನು ಅತಿಕ್ರಮ ಮಾಡಿ ಚೀನಾ ತಪ್ಪು ಮಾಡಿದೆ ಎಂದರು. ಇದರಿಂದ ಎರಡು ರಾಷ್ಟ್ರಗಳ ಮಧ್ಯೆ ಬಾಂಧವ್ಯ ಮೂಡಲು ಸಾಧ್ಯವಿಲ್ಲ ಎಂದರು.
ಚೀನಾದೊಂದಿಗೆ ಸೌಹಾರ್ದಯುತ ಸಂಬಂಧ ಬೆಳೆಸಲು ಭಾರತ ಮುಂದಾಗಿದೆ. ಆದರೆ ಚೀನಾ ಮಾತ್ರ ತನ್ನ ಅತಿಕ್ರಮಣವನ್ನು ಮುಂದುವರೆಸಿದೆ ಎಂದು ಆರೋಪಿಸಿದರು.
ಈ ಹಿಂದಿನ ಕಾಂಗ್ರೆಸ್‌ನ ಕೆಟ್ಟ ನೀತಿಯಿಂದ ಭಾರತ ಹಲವು ಭಾಗ ಕಳೆದುಕೊಳ್ಳುವಂತಾಯಿತು. ಇದರಿಂದಾಗಿ ಟಿಬೆಟ್ ಅನ್ನು ಚೀನಾಗೆ ಬಿಟ್ಟುಕೊಡುವಂತಾಯಿತು ಎಂದರು. ಸುಖಾ ಸುಮ್ಮನೆ ಗಡಿ ಭಾಗವನ್ನು ಕಳೆದುಕೊಳ್ಳುವುದರಿಂದ ಅದು ಭಾರತಕ್ಕೆ ನಷ್ಟ. ಸದ್ಯ ಲಡಾಕ್ ಅನ್ನು ಉತ್ತಮ ಪ್ರವಾಸಿ ತಾಣವಾಗಿ ಮಾಡಬಲ್ಲದು ಎಂದು ರಾಜನಾಥ್ ಸಿಂಗ್ ಹೇಳಿದ್ದಾರೆ.
