ತಾಳ್ಮೆ ಕೆಟ್ಟರೆ ಚೀನಾದತ್ತ ಕೈಚಾಚ್ತೇವೆ: ಭಾರತ ಸರ್ಕಾರಕ್ಕೆ ನೇಪಾಳ ಎಚ್ಚರಿಕೆ

ಕಠ್ಮಂಡು: ``ಪೆಟ್ರೋಲಿಯಂ ಮತ್ತು ಇತರೆ ಅಗತ್ಯ ವಸ್ತುಗಳ ಪೂರೈಕೆ ಸ್ಥಗಿತಗೊಳಿಸಿ ನಮ್ಮ ತಾಳ್ಮೆ ಪರೀಕ್ಷಿಸಬೇಡಿ. ನೀವಿದನ್ನು ಮುಂದುವರಿಸಿದರೆ ನಾವು ಚೀನಾ ಸೇರಿದಂತೆ ಇದರೆ ದೇಶಗಳತ್ತ ಮುಖ ಮಾಡಲು ಹಿಂಜರಿಯುವುದಿಲ್ಲ. ಇದು ಭಾರತ ಸರ್ಕಾರಕ್ಕೆ ನೇಪಾಳ ನೀಡಿರುವ ಎಚ್ಚರಿಕೆ. 

ಭಾರತ ಮತ್ತು ನೇಪಾಳದ ನಡುವಿನ ಸಂಬಂಧ ಹದಗೆಡುತ್ತಿರುವ ನಡುವೆಯೇ ಪಿಟಿಐಗೆ ನೀಡಿದ ಸಂದರ್ಶನದಲ್ಲಿ ಮಾತನಾಡಿದ ನೇಪಾಳ ರಾಯಭಾರಿ ದೀಪ್ ಕುಮಾರ್ ಉಪಾಧ್ಯಾಯ್, ಪೆಟ್ರೋಲ್, ಡೀಸೆಲ್, ಎಲ್ಪಿಜಿಯನ್ನು ಐಒಸಿ ಮೂಲಕ ನೇಪಾಳಕ್ಕೆ ಪೂರೈಸುವ ಬಗ್ಗೆ ಇಂಡಿಯನ್ ಆಯಿಲ್ ಜತೆ ಒಪ್ಪಂದವಿದೆ. 

ಆದರೂ, ಅವರೀಗ ಪೂರೈಕೆ ಸ್ಥಗಿತಗೊಳಿಸಿದ್ದಾರೆ. ಅಗತ್ಯವಸ್ತುಗಳ ಸರಬರಾಜು ಆಗುತ್ತಿಲ್ಲ. ಇದು ಹೀಗೇ ಮುಂದುವರಿದರೆ ನಾವು ಸಾಗಣೆ ಸಮಸ್ಯೆ ಯಾದರೂ ಚೀನಾದೊಂದಿಗೆ ವ್ಯವಹಾರ ಮಾಡಬೇಕಾಗುತ್ತದೆ'' ಎಂದಿದ್ದಾರೆ. 

ಕಾಲಮಿತಿ ಸ್ಪಷ್ಟಪಡಿಸಲಿ: ಸಮಸ್ಯೆ ಬಗೆಹರಿಸಿ ಎಂದು ಭಾರತ ಸರ್ಕಾರವನ್ನು ಕೋರಿ ದ್ದೇವೆ. ಭಾರತವೂ ಪರಿಹರಿಸುವ ಭರವಸೆ ನೀಡಿದೆ. ಆದರೆ, ಅದು ಗಂಟೆಗಳಲ್ಲೋ, ವಾರಗಳಲ್ಲೋ, ತಿಂಗಳುಗಳಲ್ಲೋ ಎಂಬುದನ್ನು ಸ್ಪಷ್ಟಪಡಿಸಿಲ್ಲ. ಈ ಬಗ್ಗೆ ಭಾರತ ಸರ್ಕಾರ ಸ್ಪಷ್ಟ ಕಾಲಮಿತಿ ನಿಗದಿಪಡಿಸಿ ಹೇಳಲಿ ಎಂದೂ ರಾಯಭಾರಿ ಉಪಾಧ್ಯಾಯ್ ಆಗ್ರಹಿಸಿದ್ದಾರೆ.