ಧೋನಿಗೆ ಧೋನಿಯೇ ಸಾಟಿ: ಮತ್ತೆ ಮಾಹಿ ಶರವಗೇದ ದಾಖಲೆ ಸ್ಟಂಪಿಂಗ್ ಗೆ ಪ್ರೇಕ್ಷಕರು ಫಿದಾ!

ಮುಂಬೈ: ಮಹೇಂದ್ರ ಸಿಂಗ್ ಧೋನಿ ಕೇವಲ ಬ್ಯಾಟಿಂಗ್ ಮಾತ್ರವೇ ಅಲ್ಲ, ತಮ್ಮ ಅದ್ಬುತ ವಿಕೆಟ್ ಕೀಪಿಂಗ್ ಕೌಶಲ್ಯದಿಂದಲೂ ಭಾರಿ ಖ್ಯಾತಿ ಗಳಿಸಿದ್ದಾರೆ. 

ಧೋನಿ ವಿಕೆಟ್ ಕೀಪಿಂಗ್ ಕೌಶಲ್ಯಕ್ಕೆ ಮತ್ತೊಂದು ಸಾಕ್ಷಿ ಎಂಬಂತೆ ಮುಂಬೈನ ಬ್ರಬೋರ್ನ್ ಸ್ಟೇಡಿಯಂನಲ್ಲಿ ಪ್ರವಾಸಿ ವೆಸ್ಟ್​​ ಇಂಡೀಸ್​ ವಿರುದ್ಧ ಸೋಮವಾರ ನಡೆದ ನಾಲ್ಕನೇ ಏಕದಿನ ಪಂದ್ಯದಲ್ಲಿ ಅದ್ಹುತ ರೀತಿಯಲ್ಲಿ ಧೋನಿ ವಿಂಡೀಸ್ ಬ್ಯಾಟ್ಸಮನ್ ಕೀಮೋ ಪೌಲ್ ರನ್ನು ಸ್ಟಂಪಿಂಗ್ ಮೂಲಕ ಪೆವಿಲಿಯನ್ ಗೆ ಅಟ್ಟಿದ್ದಾರೆ. 

ಕೀಮೋ ಪೌಲ್ ರನ್ನು ಧೋನಿ ಕೇವಲ 00.08 ಸೆಕೆಂಡ್ ನಲ್ಲಿ ಸ್ಟಂಪೌಟ್ ಮಾಡಿದ್ದು, ಆ ಮೂಲಕ ಮತ್ತೆ ಧೋನಿ ಸ್ಟಂಪಿಂಗ್ ನಲ್ಲಿ ತಾವೇ ಚಾಂಪಿಯನ್ ಎಂಬುದನ್ನು ತೋರಿಸಿಕೊಟ್ಟಿದ್ದಾರೆ. ಆ ಮೂಲಕ ಕ್ರಿಕೆಟ್ ಇತಿಹಾಸದಲ್ಲಿ ಅತ್ಯಂತ ವೇಗದ ಸ್ಟಂಪೌಟ್ ಮಾಡಿದ ಆಟಗಾರ ಎಂಬ ಕೀರ್ತಿಗೂ ಮಾಹಿ ಭಾಜನರಾಗಿದ್ದಾರೆ. ಈ ಹಿಂದೆ ಇದೇ ಮಾಹಿ 00.0 ಸೆಕೆಂಡ್ ನಲ್ಲಿ ಸ್ಟಂಪೌಟ್ ಮಾಡಿ ದಾಖಲೆ ಬರೆದಿದ್ದರು. ಇದೀಗ ತಮ್ಮದೇ ದಾಖಲೆಯನ್ನು ಮತ್ತಷ್ಟು ಉತ್ತಮ ಪಡಿಸಿಕೊಂಡಿದ್ದಾರೆ.

ರವೀಂದ್ರ ಜಡೇಜಾ ಅವರು ಎಸೆದ 28ನೇ ಓವರ್ ​ನಲ್ಲಿ ಕೆರೆಬಿಯನ್​ ಆಟಗಾರ ಕೀಮೋ ಪೌಲ್​​ ರಕ್ಷಣಾತ್ಮಕ ಆಟವಾಡಲು ಮುಂದಾದಾಗ ಬ್ಯಾಟ್​ ನಿಂದ ತಪ್ಪಿಸಿಕೊಂಡ ಬಾಲ್​ ಧೋನಿ ಕೈಗೆ ತಲುಪಿದೆ. ಪೌಲ್​ ಹಿಂದೆ ತಿರುಗುವಷ್ಟರಲ್ಲಿಯೇ ಧೋನಿ ಸ್ಟಂಪ್​ ಮಾಡಿದ್ದನ್ನು ಕಂಡು ಸ್ವತಃ ಪೌಲ್​ ಅಂಪೈರ್​ ತೀರ್ಮಾನಕ್ಕಾಗಿ ಕಾಯದೆ ಪೆವಿಲಿಯನ್​​ ಕಡೆ ಮುಖ ಮಾಡಿದರು.​ ಈ ಅದ್ಬುತ ಸ್ಟಂಪಿಂಗ್ ಗೆ ಧೋನಿ ತೆಗೆದುಕೊಂಡಿದ್ದು ಕೇವಲ 00.08 ಸೆಕೆಂಡ್ ಗಳು ಮಾತ್ರ. ಆ ಮೂಲಕ ಧೋನಿ ಮತ್ತೊಮ್ಮೆ ತಮ್ಮ ಸಾಮರ್ಥ್ಯ ಏನೆಂಬುದನ್ನು ಸಾಬೀತು ಮಾಡಿದ್ದಾರೆ.

ಏಕದಿನ ಇತಿಹಾಸದಲ್ಲಿ ಅತೀ ಹೆಚ್ಚು ಅಂದರೆ 115 ಸ್ಟಂಪ್​ ಮಾಡಿದ ಕೀರ್ತಿ ಮಿಸ್ಟರ್ ಕೂಲ್​ ಧೋನಿ ಅವರ ಪಾಲಾಗಿದ್ದು, ಬಳಿಕದ ಸ್ಥಾನದಲ್ಲಿ 99 ಸ್ಟಂಪಿಂಗ್ ನೊಂದಿಗೆ ಶ್ರೀಲಂಕಾದ ಕುಮಾರ ಸಂಗಕ್ಕಾರ ಇದ್ದಾರೆ.