ನಾಲ್ವರು ಇರಾನಿ ಗ್ಯಾಂಗ್ ಸರಗಳ್ಳರ ಸೆರೆ

ಬೆಂಗಳೂರು: ಅಂತಾರಾಜ್ಯ ಕುಖ್ಯಾತ ಇರಾನಿ ಗ್ಯಾಂಗ್‍ನ ನಾಲ್ವರು ಸರಗಳ್ಳರನ್ನು ಬಂಧಿಸಿರುವ ಚಂದ್ರಾಲೇಔಟ್ ಠಾಣೆ ಪೊಲೀಸರು ರು.19.50 ಲಕ್ಷ ಮೌಲ್ಯದ 781 ಗ್ರಾಂ ಚಿನ್ನಾಭರಣ ವಶಪಡಿಸಿಕೊಂಡಿದ್ದಾರೆ.

ಮಧ್ಯಪ್ರದೇಶದ ಮುರ್ತಜಾ(30), ಹೈದರ್ (19)ಶಾಹದಾಬ್ (23) ಮತ್ತು ಗುಫ್ರಾನ್ (19) ಬಂಧಿತರು. ಆರೋಪಿಗಳು ನಗರದ ರಸ್ತೆಗಳಲ್ಲಿ ಸಂಚರಿಸುವ ಒಂಟಿ ಮಹಿಳೆಯರು, ವೃದ್ಧೆಯರನ್ನು  ಗುರಿಯಾಗಿಸಿಕೊಂಡು ಬೈಕ್‍ನಲ್ಲಿ ಹಿಂಬಾಲಿಸುತ್ತಿದ್ದರು. ವಿಳಾಸ ಕೇಳುವ, ನೀರು ಕೇಳುವ ನೆಪದಲ್ಲಿ ಸರಗಳನ್ನು ಕಿತ್ತುಕೊಂಡು ಪರಾರಿಯಾಗುತ್ತಿದ್ದರು. ಆರೋಪಿಗಳ ಬಂಧನದಿಂದ ನಗರದ  ವಿವಿಧ ಠಾಣೆಗಳಲ್ಲಿ ದಾಖಲಾಗಿದ್ದ 18 ಸರಗಳ್ಳತನ ಪ್ರಕರಣಗಳು ಬೆಳಕಿಗೆ ಬಂದಿವೆ.

ಇತ್ತೀಚೆಗೆ ನಗರದಲ್ಲಿ ಸರಗಳ್ಳತನ ಪ್ರಕರಣಗಳು ಹೆಚ್ಚಾಗುತ್ತಿದ್ದಂತೆ ಪೊಲೀಸರು ಆರೋಪಿಗಳ ಚಲನವಲನಗಳ ಮೇಲೆ ಹದ್ದಿನ ಕಣ್ಣಿಟ್ಟಿದ್ದರು. ಕೊನೆಗೆ ಆರೋಪಿಗಳ ಜಾಡು ಹಿಡಿದು ಹೊರಟ  ಪೊಲೀಸರು ಹೈದರಾಬಾದ್, ತೆಲಂಗಾಣ, ವಿಶಾಖಪಟ್ಟಣಂ, ಭೋಪಾಲ್‍ಗಳಿಗೆ ಭೇಟಿ ನೀಡಿದ್ದರು. ಈ ವೇಳೆ ಭೋಪಾಲ್‍ನ ಜಹಾಂಗೀರಾಬಾದ್ ಪೊಲೀಸರು ಆರೋಪಿಗಳನ್ನು ಬಂಧಿಸಿ ಜೈಲಿಗೆ  ಕುಳುಹಿಸಿ ರುವ ಬಗ್ಗೆ ಮಾಹಿತಿ ದೊರೆಯಿತು.

ಇದರಿಂದ ನ್ಯಾಯಾಲದ ಅನುಮತಿ ಪಡೆದು ಚಂಚಲಗೂಡು ಮತ್ತು ವಿಶಾಖ ಪಟ್ಟಣಂ ಕೇಂದ್ರಕಾರಾಗೃಹದಿಂದ ಆರೋಪಿಗಳನ್ನು ವಶಕ್ಕೆ ಪಡೆದು  ರಾಜ್ಯಕ್ಕೆ ಕರೆತಂದಿದ್ದರು. ಆರೋಪಿಗಳ ವಿಚಾರಣೆ ಯಿಂದ ನಗರದ ವಿವಿಧ ಠಾಣೆಗಳ ವ್ಯಾಪ್ತಿ ಯಲ್ಲಿ ಕಳವಾಗಿದ್ದ 18 ಸರಗಳ್ಳತನ ಪ್ರಕರಣಗಳು ಪತ್ತೆಯಾಗಿವೆ.